Gen 21 | MEU | STEP | Bena Iehova ese Sara e vadivadi henia bona ena gwau-hamata heḡereḡerena e kara henia.

Genesis 21

Isaak e vara

1 Bena Iehova ese Sara e vadivadi henia bona ena gwau-hamata heḡereḡerena e kara henia. 2 Bena Sara e rogorogo, e mara, mero ta e abia Abraham ena, edia ḡauka negana ai, Dirava ese e gwauraia guna heḡereḡerena. 3 Bena Abraham ese natuna, Sara e abia merona, ladana e hatoa Isaak. ^{▼▼“Isaak” anina be “Kiri”.} 4 Dina ihataurahanina ai, Abraham ese natuna Isaak e peritomea, Dirava ese e haḡania heḡereḡerena. 5 Abraham ena maun laḡanidia na sinahu-ta, natuna Isaak e vara negana ai. 6 Bena Sara eto, Dirava ese egu kiri badina vada e havaraia; harina bae kamonai taudia iboudiai na lau ida baia kiri hebou. 7 Ma eto, Daika ese Abraham bema hamaoroa, bema toma Sara ese natuna baine ubua? Gau tamona, iahuna ai natuna vada na henia.

8 Mero na e bada oho bada oho ela bona rata e negea; bena Abraham ese aria badana e karaia, Isaak ese rata e negea dinana ai. 9 Bena Sara ese Hagara, hane Aigupto, natuna, Abraham ese e havaraia merona, e itaia, ia ese Isaak e kirikirilaia. 10 Bena ia ese Abraham e hamaoroa, eto, Hesiai hahinena mai natuna ida a luludia, badina be ina hesiai hahinena natuna na oi dihimu ai basinela, natugu Isaak ida. 11 Bena Abraham lalona e hisihisi bada, natuna dainai. 12 A Dirava ese Abraham e hereva henia, eto, Lalomu basine hisihisi ina mero dainai bona emu hesiai hahinena dainai. Sara ena hereva iboudiai bavabi dae, badina be Isaak ena amo oi besemu do baine vara. 13 A hesiai hahinena natuna danu bese badana ai baina halaoa, badina be ia na oi natumu.

14 Daba matana ai Abraham na e tore isi, lagwa e abia, bona ranu danu nani kopina ai, Hagara e henia; ia na paḡana ai e atoa, bona mero danu; bena e siaia lao. Bena hahine na vada ela, Bere-sieba tano ḡaḡaena ai ehaloa. 15 Ranu na nani kopina na vada e ore ai, ia ese mero maraḡina e abia, au maraḡina ta henunai e atoa diho; 16 bena taina e raka lao, diba bema kinoa heḡereḡerena; bena tano ai e helai diho, e tai dikadika, eto, Mero ena mase basina itaia. 17 Dirava ese mero gadona e kamonai, bena Dirava ena aneru ta ese guba amo Hagara e boi henia, eto, Hagara e, oi na edeheto? Asio gari, badina be Dirava ese mero gadona vada e kamonai. 18 A tore isi, mero na avabia isi, imamu ai ba dogoa tao, badina be lau ese bese badana ai baina halaoa. 19 Bena Dirava ese matana e hapapa; bena ia ese ranu gurina ta e itaia; bena nani kopina e hahonua, mero na ranu e ha-inulaia. 20 Dirava ese mero na e reḡua. Ia na e bada oho bada oho, tano ḡaḡaena ai eha noho; ia na taraki-taraki e diba ḡoeva. 21 Ia na Paran tano ḡaḡaena ai e nohova; bena sinana ese Aigupto hane-ulatona ta e abia, ia baine adavaia.

Abraham bona Abimelek e herohemaino

22 Una negana ai Abimelek bona Fikol, ena tuari oreana biaguna, ese Abraham e hamaoroa, eto, Vada name diba Dirava ese e bamomumu emu kara iboudiai lalodiai. 23 Taunabunai, Dirava ladana ai ba gwau henigu hamata, oi na basio koigu, bona natugu bona tubugu basio koidia; a lau ese vada na kara namo henimu heḡereḡerena oi danu lau ba kara namo henigu bona ina o noholaiamu tanona danu ba kara namo henia. 24 Bena Abraham eto, Vada baina gwau hamata. 25 A Abraham ese Abimelek e gwau henia, Abimelek ena hesiai taudia ese ranu gurina ta e abia havara dainai. 26 Bena Abimelek eto, Asi dibagu daika ese unu e kara toma; oi ese so hamaorogu bona asi dibagu ema bona hari dina.

27 Bena Abraham ese mamoe bona boromakau e abidia, Abimelek e henia; bena idia raruosi e herohemaino. 28 Bena Abraham ese mamoe natudia hitu e abidia, kaha ta ai e atodia tabe. 29 Abimelek ese Abraham e nanadaia, eto, Ene mamoe natudia hitu kaha ta ai o atodia tabe be dahaka? 30 Abraham e haere, eto, Ini egu mamoe natudia hituosi avabi, lau ese ina ranu gurina na ḡeia toana. 31 Bena una gabu ladana e hatoa Bere-sieba, ^{▼▼anina be “Gwau-hamata gurina”.} badina be raruosi unuseni ai e gwau hamata heheni. 32 Taunabunai, idia raruosi na Bere-sieba ai e herohemaino; bena Abimelek bona Fikol, ena tuari oreana biaguna, e lou lao, Filistia tanona ela. 33 A Abraham ese au helaḡana ta e hadoa Bere-sieba ai, bona Iehova, Noho-hanaihanai Diravana, ladana e hahanea. 34 Bena Abraham na nega daudau Filistia tanona ai e noho hedoa.